एजेन्सी। रसिया विश्वकपको प्रमुख दाबेदार मानिएको लियोनल मेस्सीको कप्तानीमा रहेको अर्जेन्टिनाले गएराति क्रोएशियासँग लज्जास्पद हार बेहोर्न बाध्य भयो । विश्वभरका अर्जेन्टिनाका फ्यान निराश बने । कारण, कप्तान लियोनल मेस्सीको खराब प्रदर्शन । यसपटक उनको अन्तिम विश्वकप हुने र यसमा उनले उच्च प्रदर्शन गर्नेमा फ्यानहरु आशावादी थिए तर ठीक विपरीत नतिजा आइदिँदा विश्वकपले अर्कै मोड लिएको छ ।
क्रोएशियाले ३-० गोल अन्तरले म्याच जित्दा अर्जेन्टिना अर्को चरणमा पुग्ने सम्भावना लगभग सकिएको छ । समुहचरणको पहिलो खेलमा आइसल्याण्डसँग अंक बाँडेको अर्जेन्टिनाको मात्र १ अंक छ । यस्तो अवस्थामा अन्तिम १६ मा पुग्न उसले अरुको नतिजामा भर पर्ने हुन्छ । क्रोएशियाको दुई खेलमा जीत हासिल गर्दै ६ अंक प्राप्त गरेको छ भने नाइजेरियाको अंक शुन्य छ ।आजको खेलमा आइसल्याण्डलाई नाइजेरियाले रोक्न सकेमा र अर्जेन्टिनाले बाँकी एक खेल आफ्नो पक्षमा पारेमा छनोट हुने सम्भावना जीवितै रहनेछ ।
