काठमाडौं–पत्नी सीता दाहालको उपचारमा अचानक सिंगापुर गएका नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डको बसाई लम्बिएको छ ।प्रचण्ड पत्नी सीतालाई लिएर असार ३ गते अचानक सिंगापुर गएका थिए ।केही दिन सिंगापुरमा रहने भनिएपनि उनको बसाई लम्बिएको उनको सचिवालयले जनाएको छ । यसअघि प्रचण्ड ८ असारमा फर्किने बताइएको थियो ।‘कहिले फर्किने भन्ने कुनै निश्चित भएको छैन’ प्रचण्डका प्रेस सल्लाहकार विष्णु सापकोटाले रातोपाटीसँग भने ।
यस अघि सीताको उपचार केही महिना अगाडि दिल्लीमा भएको थियो । छोरा प्रकाशको असमायिक निधन पछि सीताको स्वास्थ्यमा झन्–झन् समस्या आएको थियो । कलेजोको समस्याबाट पीडित सीताको यसअघि पनि सिंगापुरमै उपचार गरिएको थियो ।चिकित्सकको सुझाव अनुसार सीताको उपचारको फ्लोअपका लागि प्रचण्ड सिंगापुरतर्फ गएका थिए । चिकित्सकले सिंगापुरको एमपी एलिजाबेथ अस्पतालमा एकपटक स्वास्थ्य परिक्षण गराउन सुझाव दिएको प्रचण्डका प्रेस सल्लाहाकार सापकोटाले बताए ।
