एजेन्सी। भारतमा एकै परिवारका ११ जना सदस्यको रहस्यमय मृत्यु भएको खबरले अहिले भारत मात्र होइन विश्वमा त्यसले सनसनी मच्चाएको छ । भारतको राजधानी दिल्लीमा एउटै परिवारका ११ जनाको रहस्यमय मृत्यु भएको थियो । २२ दिन अघि भएको सो घटनाको कारण अझै खुल्न सकेको छैन । सो घटनाको प्रत्यक्षदर्शी बनेको सो परिवारको कुकुरको पनि मृत्यु भएपछि घटना झन रहस्यमय बनेको छ ।
११ जनाको सामुहिक मृत्युको मुख्य योजनाकार ललितको निकै प्रिय कुकुर टमीको ठिक २२ दिनपछि हिजो हर्ट एट्याकका कारण मृत्यु भएको हो । सो घटना भएदेखि नै बिरामी रहेको सो कुकुरको उपचार भइरहेको थियो । घटना भएपछि झण्डै तीन दिन छतमा रहेको सो कुकुरलाई १०८ डिग्रीको ज्वरो आएको थियो ।
परिवारको सदस्य जस्तै रहेको सो टमिको उपचार नोयडामा भइरहेको थियो । जनावरको रेखदेख गर्ने संस्थाले सो कुकुरको उपचार गरिरहेको थियो । नोएडाको सेक्टर ५५ मा उपचारार्थ रहेको कुकुरको हर्ट अट्याकका कारण मृत्यु भएको बताइएको छ । उपचारका लागि ल्याउंदा निकै चिन्ताजनक अवस्थामा रहेको टमिको स्वास्थ्यमा सुधार हुंदै गइरहेको थियो । विस्तारै खेल्न समेत सुरु गरेको टमीलाई आइतबार अचानक टमीलाई हर्ट एट्याक भयो र उसको मृत्यु भयो ।
पिटबुल इण्डियन मिक्स प्रजातिको सो कुकुर परिवारका सदस्यको मृत्यु भएपछि टमीले केही पनि खाएको थिएन । १०८ डिग्री जरो आएको टमीले अस्पताल ल्याइएपछि पनि २४ घण्टा केही खाएको थिएन । त्यो पीडालाई सहन नसकेर उसको आँखाबाट आँसु बगिरहेको थियो । उसको त्यस्तो हालत देख्नेहरुका समेत आँखा रसाएका थिए ।
