सोलुखुम्बु । माथिबाट पहिरो खस्दा सोलुखुम्बुको महाकुलुङमा डोजरसहित सहचालक पुरिएका छन् । महाकुलुङ गाउँपालिका–१ बुङको पात्लेमा सडक निर्माण गरिरहेको समय माथिबाट खसेको पहिरोले डोजर र सहचालक पुरेको जिल्ला प्रहरी कार्यालय सोलुखुम्बुले जनाएको छ ।
बिहीबार दिउँसो साढे १ बजे पात्लेको बबर्दो भिरमा सडक खन्ने क्रममा एक्कासी माथिबाट पहिरो खस्दा नेचासल्यान गाउँपालिका–३ का २२ वर्षीय लोचन गौतम पुरिएको प्रहरी निरीक्षक एवम् सूचना अधिकारी प्रद्युम्न कुमार अधिकारीले जानकारी दिए ।
डोजर चालक ओखलढुंगाका कमल भुजेल खाना खान गएको समयमा सहचालक गौतमले डोजरमा ग्रिज लगाउने क्रममा पहिरोले पुरेको बताइएको छ ।
सहचालकसँगै पुरिएको बा २ क ८०१७ नम्बरको बोबेल कम्पनीको डोजर महाकुलुङ गाउँपालिकाको लिखोला खोल्सीबाट बुङ बजारसम्म सडक खन्न प्रयोग गरिंदै आएको प्रहरीले जनाएको छ ।
