काठमाडौँ: यहाँको तारकेश्वर नगरपालिका-४ फूलबारी गेट नजिकै शमशेर दल गणको हाताभित्र रहेको पर्खालको छेउमा एकजना पुरुषको बेवारिसे शव भेटिएको छ। पहिचान खुल्न नसकेको, मोटो शरिर भएको करिब ५ फिट ६ इन्च अग्लो, कालो रंगको फूल बाहुला भएको टिसर्ट लगाएको पुरुषको बेवासिरसे शव भेटिएको महानगरीय प्रहरी अपराध महाशाखाले जानकारी दिएकोछ ।
ती व्यक्तिको शरिरमा सेतो भेस्ट, निलो रंगको जिन्स पाइन्ट, रातो निलो फिता भएको निलो फिताबीचमा रातो पहेँलो धर्का भएको ट्रेकिङ चप्पल लगाएको पाइएको छ । त्यसैगरी पाइन्टमा लगाउने कालो रंगको छालाको पेटी र निलो रंगको पेटीको बक्कल बक्कलमा पहेलो रंगले अक्षर लेखिएको, घाँटिमा कालोमा पहेलो रंग भएको धागो बाँधिएको र धागोमा रुद्राक्ष जस्तो प्लास्टिको डल्लो झुण्डाइएको, हातमा डोरो र पाइन्टको गोजीमा भारतीय १ रुपैयाँको सिक्का भेटिएको प्रहरीले जनाएको छ ।